Është prezantuar sot Rregullorja e Re e Inspektoratit Qendror për Përcaktimin e Procedurës së Inspektimeve. Në takimin e zhvilluar në ambientet e kryeministrisë zëvendëskryeministrja Senida Mesi dhe Kryeinspektori i Përgjithshëm Shkëlqim Hajdari folën për rëndësinë e implementimit të një ligji të ri.
Kjo rregullore synon standardizimin e proceseve të inspektimeve nga inspektoratet e ndryshme, dixhitalizimin dhe reduktimin e korrupsionit.
“Përveç dy inspektorateve shtetërore, të gjithë inspektoratet e tjera i kryejnë inspektimet online. Ka problematika sepse bëhen online, por bëhen pa procedurë ligjore.
Brenda muajit nëntor të gjithë laptopët do të zëvendësohen me një teknologji shumë të lartë. Ne do të ndalojmë çdo trup inspektimi që kërkon ta bëjë të paligjshme,”- u shpreh Kryeinspektori Hajdari.
Ndërkohë zv/kryeministrja Mesi foli për rëndësinë e edukimit të bizneseve, në mënyrë që të mos kalohen në masa ndëshkuese të menjëhershme. Si edhe të ketë kujdes më të veçantë në përzgjedhjen e inspektorëve.
“Inspektimet duhet të kryejnë funksionin e tyre, por edhe të edukojnë biznesin nga ana tjetër. Asnjëherë biznesi nuk do të gjendet më në padijeni se çfarë do të inspektohet dhe cilat rregulla duhet të plotësojë.”
Gjatë bashkëbisedimi kryetarë e përfaqësues të dhomave të biznesit vendas e të huaj, u shprehën se inspektimet kanë qenë gjithmonë problematike, pasi ministritë nuk i kanë dhënë vëmendjen e duhur.
“Vetë fakti që ne bëjmë një rregullore në këtë moment tregon që ka problematika. Për ne krijimi i këtij ligji të ri është i mirëpritur dhe i kërkuar,”-shprehet Enida Bezhani, nga Dhoma Amerikane e Tregtisë.
Inspektorë të paaftë
“Inspektimi ka qenë gjithmonë një lodër në dorë të ministrive. Dhe arsyeja përse kemi patur gjithmonë inspektime problematike lidhet është se ato persona që kanë qenë në inspektim janë persona të cilët nuk i takon të jenë aty.
Një nga sfidat e para të ligjit të ri është sesi do të ndahet kjo dominancë dhe autoriteti i ministrit tek inspektimi dhe inspektorët që kanë nën varësinë e tyre,”-thotë Arben Shkodra, nga Bashkimi i Prodhuesve Shqiptarë.
Kryeinspektori Hajdari u shpreh se kur të bëhet reforma e inspektimeve, nuk do të bëhet në bazë ministrie por ajo do të jetë një dhe e vetme.
Ndërkohë, zv/kryeministrja Mesi tha se procesi i inspektimit to të jetë i koordinuar dhe se përsëri politikat do të vendosen nga ministritë.
“Menaxhimi i politikave dhe strategjive do të rrinë e do të vazhdojnë gjithmonë nën ministrinë përkatëse. Është ministri dhe ministria që bën politikat dhe strategjitë. Por, kjo nuk duhet të ketë rëndësi për ju, ajo që ka rëndësi është që procesi është i koordinuar.”
Mesi premtoi se drafti do të kalojë shumë shpejt edhe në Këshillin e Ministrave, për të marrë fund ky ngërç.
“Duhet që njëherë e mirë në të arrijmë që jo vetëm të rregullojmë me ligj, por edhe qasje direkte karshi bizneseve në lidhje me inspektimin.” TIRANA TODAY
