Frika nga gjakmarrja ka detyruar familjarët e Kujtim Koxhës, i cili vrau tre vetë, që të largohen nga banesa. Banorë të fshatit janë rrëfyer se Vjollca Koxha kishte shitur bagëtitë, dhe sendet e tjera. E shoqëruar nga policia, ajo ka udhëtuar drejt Tiranës, atje ku familja Koxha ka një banesë të ndërtuar vitet e fundit.
Në banesë qëndronte vetëm bashkëshortja dhe një motër e Koxhës, ndërsa fëmijët e tyre ndodhen jashtë Shqipërisë. Banorët kanë thënë më tej se ka qenë e pamundur që familja Koxha të qëndronte në atë fshat. Kujtimi ka vrarë tre persona duke ngrënë bukë, në qëndër të fshatit. Po kështu ishte e pamundur që policia të qëndronte me muaj të tërë pranë familjes.
“Ishte e pamundur që familja Koxha të qëndronte më tej në fshat. Kujtimi ka vrarë tre veta, duke ngrënë bukë, në mes të ditës, në qendër të fshatit. As policia nuk mund të qëndronte me muaj pranë kësaj familje. Vjollca shiti delet, lopët, kafshët e barrës dhe iku në Tiranë. Mjeti me të cilin ajo mori çfarë i duhej bëri dy rrugë. Me siguri, frika nga hakmarrja bëri që ajo ta lërë vendlindjen e burrit të saj, pas afro 30 vitesh”, kanë thënë banorë të fshatit për “Panorama”.
Në Shëlli qëndrojnë ende dy vëllezër të Kujtim Koxhës. Sipas gjasave, ata duhet të largohen, pasi Kanuni vepron edhe për vëllezërit e autorit. Banorët kanë deklaruar se Kujtim Koxha ka kryer një krim shumë të rëndë, dhe se familjarët e viktimave një ditë mund të hakmerren.
“Edhe vëllezërit e Kujtimit duhet të ikin nga Shëlliu. Ai ka kryer një krim shumë të rëndë, dhe një farë barre bie edhe mbi ata. Familjarët e tri viktimave kanë hall të madh, dhe ata një ditë mund të hakmerren edhe mbi vëllezërit e Kujtimit. Në Veri, Kanuni ka zënë vend dhe gjithçka mund të ndodhë”, pohuan banorët e Shëlliut. Autori kryesor i dyshuar për masakrën nuk ka pranuar të flasë para Gjykatës.
Ai ka shprehur pendesë, dhe para pak ditësh ka tentuar të vetëvritet në ambientet e Burgut të Sigurisë së Lartë Burrel. Pavarësisht se bashkëshortja e Koxhës ishte shprehur më herët se nuk do ta braktiste të shoqin, ka ndodhur krejt e kundërta. Ajo dhe fëmijët e saj e kanë braktisur autorin e kësaj masakre.
