Ilir Meta duket se nuk ka vendosur ende, nëse do e dekretojë Sandër Lleshin si Ministër të Brendshëm. Ai ka deklaruar në studion e emisionit “Fakt”, se do të marrë kohën e duhur. Po kështu, Meta i ka mëshuar fort faktit se për asnjë arsye nuk mund të hedh firmë për dekrete formale. E si për ti vënë vulën përfundimtare kësaj çështje, ai tha se di të marrë vendimet, pa u ndikuar nga askush.
“Do gjej kohën e duhur, për të marrë vendimin e duhur. Presidenti ka për detyrë për të ushtruar të gjitha detyrimet kushtetuese, për çdo propozim që i bëhet.
Nuk mund të hedh firmë për dekrete formale, e aq më tepër për një detyrë të tillë, që në momentin aktual, kërkon përgjegjshmëri.
Di të marr vendimet e mia, pa u ndikuar nga askush. As nga orët, dhe sekondat.
Kushtetuta është shumë e qartë. Presidenti ka përgjegjësi për çdo firmë që hedh. Ua kam thënë të qartë, kam bërë punën time institucionale. Kam bërë përpjekjet e mia, kam qenë mjaft bashkëpunues me institucionet dhe personat e interesuar për këtë çështje. Dhe unë i marr vendimet e mia pa u ndikuar nga askush”, u shpreh Meta.
