Presidenti Meta ka organizuar një pritje me gazetarët dhe atashetë e shtypit të ambasadave të huaja, ku nënvizoi rëndësinë e lirisë së medias dhe gazetarëve, në raportimin e ngjarjeve. Kreu i shtetit dënoi me forcë të gjitha ngjarjet kriminale dhe kërcënimet, ku pre e këtyre sulmeve kanë qenë gazetarët. Ai apeloi ndaj gazetarëve që të vijojnë pa u trembur në raportimin e lajmit, dhe pa u shantazhuar nga askush. Po kështu, Meta nuk ka nguruar që ti japë një mesazh të qartë institucioneve, që të zbardhen sulmet ndaj gazetarëve, pasi çdo vonesë ndikon negativisht në lirinë e shprehjes.
“Dua të shpreh mirënjohjen dhe solidaritetin për të gjithë komunitetin tuaj, për gazetaret dhe gazetarët. Për misionin dhe profesionalizim dhe të drejtën e fjalës së lirë. Liria e medias është një kusht i pazëvendësueshëm për garantimin e të Drejtave të Njeriut në një shoqëri demokratike.
Kur cënohet liria dhe të drejtat e gazetarit, është cënuar themeli i sistemit demokratik. Një solidaritet dua të shpreh për gazetarët e terrenit. Për ata që raportojnë ngjarjet, faktet në mënyrë të menjëhershme.
Apeli im sot është që gazetarët të vijojnë pa u trembur në raportimin e lajmit, dhe pa u shantazhuar nga askush. Dua të përsëris thirrjen time edhe më parë të bërë publike, ndaj institucioneve, që të zbardhen sulmet ndaj gazetarëve. Fatkeqësisht të shpeshtuara, pasi çdo vonesë në këtë drejtim ndikon negativisht në lirinë e shprehjes në vendin tonë. Mosndëshkimi i tyre kundër gazetarëve duhet të marrë fund njëherë e përgjithmonë. Asnjë gazetari nuk duhet t’i rrezikohet jeta apo ti rrezikohet vendi i punës për shkak të një lajmi”, tha presidenti Meta.
