Titaniku, është pa asnjë diskutim tragjedia detare më e romantizuar. Por ajo nuk qe tragjedia më e madhe njerëzore në det. 33 vite më vonë, do të mbytej në ujërat e acarta të detit Balltik kryqëzori gjerman “MV Wilhelm Gustloff”. Gati 10 mijë njerëz gjetën vdekjen, më shumë se gjysma e tyre fëmijë. Anija ishte nisur nga qyteti polak i Gdinias me destinacion Kielin në veri të Gjermanisë.
Në bord ndodheshin kryesisht refugjatë lufte, gjermanë, lituanezë, letonezë, polakë etj, si edhe 1000 ushtarë dhe anëtarë të Gestapos. Një nëndetëse ruse e pikasi, dhe e qëlloi me 3 silurë më 30 janar 1945. Anija 25 mijë tonëshe, u mbyt në më pak se 40 minuta.
Ngjarja pati një farë buje momentale. Por ndërkohë kishin vdekur dhjetëra miliona njerëz. Vdekja e 9343 njerëzve, vetëm sa iu shtua statistikave të tmerrshme të kasaphanës që po ndodhte. Anija mbante zyrtarisht në bord 10.582 njerëz. Mes qindra të mbijetuarve, ishte piloti 19 vjeçar gjerman Heinz Schön.
Ai ia kushtoi pjesën më të madhe të jetës, dokumentimit të asaj tragjedie. Kur vdiq në vitin 2013, një ekip zhytësish çuan në fundin e detit hirin e trupit të tij, për t’u prehur përgjithmonë në reliket e anijes gjigante, së bashku me gjithë të tjerët që nuk qenë aq fatlumë sa ai.
