Kreu i Bashkisë së Durrësit habiti me deklaratat e tij kur u justifikua për përgjimet me Avdylajt, duke thënë se për votë mund të takohet me çdo qytetar që ka të drejtë vote.
Por, duket se deputetët e Partisë Socialiste nuk janë dakord me këto deklarata dhe e kundërshtojnë publikisht Dakon.
Erion Braçe thekson se vota sigurisht që ka parime dhe në 22 vite që ai vetë përballet në fushata, u ka qëndruar këtyre parimeve.
“Nëse Dako ka thënë se te vota nuk ka parime, natyrisht që unë nuk bie dakord nga mëngjesi deri në darkë. Te vota sigurisht që ka parime. Ka parime që ç’ke me të. Kam 22 vite që përballem me njerëzit për vota dhe jam përballur me ta me parime, nuk jam përballur me ta pa parime”, ka deklaruar Braçe.
Klotilda Bushka, deputete e PS-së u shpreh po ashtu kundër bashkëpunimit të politikës me individë me rekorde kriminale në zgjedhje:
“Asnjë zyrtar i lartë nuk duhet të bashkëpunojë me asnjë grup dhe të kryejë aktivitet të jashtëligjshëm”, thekson Bushka.
Edhe për sekretarin organizativ në PS, Arben Pëllumbi, për aq kohë sa edhe ish-të dënuarit kanë të drejtë vote, s’ka asgjë të keqe që një kandidat të kërkojë votën e tyre, me kushtin që të mos ketë shkëmbim favoresh.
“A është votues? A është një qytetar që ka votuar dhe dje, dhe pardje, edhe para 10 vjetësh? Vota është votë. Ti mund ta takosh. Është tjetër gjë të bësh kompromise, është tjetër gjë të kërkosh të shesësh votën, është tjetër gjë të bësh marrëveshje. T’i kërkosh si një njeri i thjeshtë që voton, nuk është asgjë e keqe, përndryshe pse ai ka të drejtë vote? Mund të mos kishte të drejtë vote dhe nuk e kishim këtë problem”.
