Është kthyer në një ndër lojtarët kryesor të ekipit dhe e ka ndihmuar me gola mjaft të bukur. Për këtë arsye skuadra e Levantes rinovoi me Enis Bardhin kontratën deri në vitin 2022 dhe vendosi një klauzolë 50 milionë euro. Futbollisti shqiptar që mbron ngjyrat e Maqedonisë u bë i njohur për goditjet e dënimit që ekzekuton në mënyrë perfekte dhe është rivali i vetëm i Messit në La Liga.
“Te Levante ndihem si në shtëpinë time dhe do të qëndroj për shumë vjet të tjerë. Jam mirënjohës ndaj klubit për mënyrën si më ka trajtuar. Ndeshjet e deritanishme më kanë shtuar vetëbesimin dhe tifozët më mbështetin. Do të mbetem në qytetin e Valencias”, tha Bardhi.
Skuadra e Levantes ka kërkuar në këtë mënyrë ti paraprijë lëvizjeve të merkatos së janarit, pasi paraqitjet e futbollistit shqiptar kanë tërhequr vëmendjen e shumë ekipeve europiane. 23-vjeçari i lindur në Shkup, është aktivizuar në 38 ndeshje me Levanten, dhe ka shënuar 10 gola.
