Siç edhe i dhanë shenjat, sherri mes ministrave grekë nxorri në skenë se qeveria greke ka financuar në mënyrë sekrete disa media dhe portale shqiptare, sikurse edhe politikanë që merren me Marrëveshjen e Detit.
Sherri që ndodhi ditë më parë mes ministrave në qeverinë greke, nxorri në pah fakte skandaloze për cënimin e interesave kombëtare të Shqipërisë. Por përkundrejt të gjitha zërave që qarkullojnë, ish Ministri i Jashtëm, Nikos Kotzias, i hedh poshtë.
Përmes një interviste, ai ka shpjeguar se si funksionon mekanizmi i fondeve sekrete. Kotzias i ka cilësuar si të rreme publikimet se fonde sekrete janë dhënë edhe në Shqipëri.
“U bë një lajm i rremë, se shkuan fonde në Shqipëri”, tha ai.
“E dini çfarë ndodhi? Në Shqipëri, kush ka qasje pozitive ndaj Greqisë, akuzohet që pardje se është “i kapur”. Dhe si është i kapur? E thotë dhe vetë partneri i qeverisë”.
Këtu Kotzias e ka fjalën për Ministrin e Mbrojtjes, Panos Kammenos, i cili në mbledhjen e këshillit të ministrave, pas të cilës Kotzias dha dorëheqjen, tha ndër të tjera se “qeveria greke merr para nga Soros që të blejë të huajt”.
“Këto u thashë dhe në mbledhjen e qeverisë, që këto nuk janë lojëra. Vendi ynë duhet të bëhet serioz. Këta budallenj, naivë dhe tradhëtarë, që përpiqen të nxjerrin lajme të rreme ose jo, se ku shkojnë fondet sekrete te vendit. I kap neni për “tradhëti kombëtare”.
Më herët, mediat greke kanë raportuar se Ministria e Jashtme Greke ka financuar media, portale dhe gazetarë në Shqipëri, në mënyrë sekrete. Edhe negociatorët në Marrëveshjen për Detin kanë kode sekrete financimi.
