Deputeti i Partisë Demokratike, Edi Paloka ka komentuar arrestimet e bëra së fundmi të zyrtarëve e ish-zyrtarëve të institucioneve publike.
I ftuar në rubrikën “Opinion”, Paloka tha se Rama po tenton të heqë vëmendjen nga vetja, ndërsa tha se po kapen ‘peshqit e vegjël’ që të mbulojnë të mëdhenjtë.
Gjithashtu, demokrati foli mbi një dosje përgjimi që është që prej 2016-ës në Prokurori, ku implikohet sipas tij kryetari i Bashkisë së Durrësit, Vangjush Dako. Po ashtu, Paloka tha se të përfshirë në përgjime janë edhe ministrat Arben Ahmetaj dhe Damian Gjiknuri.
Fjala e Palokës:
Prokuroria që e kemi akuzuar si të njëanshme dhe të kapur nga Rama, po godet persona të lidhur me pushtetin, me PS. Pra në pamje të parë kemi të bëjmë me një akt që duhet të duartrokitet. Por në fakt nuk është ashtu. Është dosja në prokurori që mban numrin 339, e vitit 2016. Është kjo dosje që kanë nisur përgjimet e Dakos. Nuk janë të njëjtat çështje. Kjo dosje u denoncua nga zoti Basha dhe më pas ka pasur u dërgua padia nga Dako në gjykatë për kryetarin e PD, ku ai e akuzoi për shpifje. Hilja që ka bërë këtë herë prokuroria është se e ka fshehur këtë dosje.
Gjiknuri dhe Arben Ahmetaj dalin në komunikime me elemente kriminalë në shitje-blerjen e votave. Kanë dosje të tjera, nuk është e njëjta dosje. Bëhet fjalë për zgjedhjet e 2017-ën. Janë të faktuara. Shpërthimi i kësaj dosje nuk vjen as nga vullneti e dëshira e Ramës. Është DEA dhe Gjermania që erdhi dhe e detyroi këtë qeveri që të veprojë. Rama po përpiqet që të shpëtojë kokat. Kjo beteje e Ramës bëhet për të shpëtuar këta elementë që përmendja dhe veten e tij. Historia e kësaj dosje nuk ka mbaruar. Ata që e kanë nxitur këtë dosje, s’kanë mbaruar punë.
