Në vitin 1997 u ekzekutua nga një breshëri plumbash ish-futbollisti i ‘Butrintit’, Zoi Dhima. Prokuroria e Sarandës mbas më shumë se 21 vitesh ka mbyllur hetimet për dosjen në fjalë, pasi kështu është e parashikuar në Kodin Penal.
Ne vendimin e datës 17.10.2018, Gjykata e Sarandës, pas kërkesës se Prokurorisë argumenton: “Gjykata konkludon që të pranojë kërkesën e organit të akuzës dhe të pushojë çështjen që i përket procedimit penal nr.02 te vitit 1998, pasi del qarte se në rastin e veprës penale “Vrasje me dashje” dhe “Armëmbajtje pa leje”, parashikuar nga neni 76 dhe 278 i Kodit Penal, ndjekja penale për këtë vepër penale tashmë është parashkruar dhe si e tillë duhet të pushojë.
Ngjarja e rende, sipas vendimit te Gjykatës, ka ndodhur në datën 18.05.1997, rreth orës 12:00, në lagjen nr.1 të qytetit të Sarandës, në afërsi të një lokali, ku është vrarë me armë zjarri nga persona të paidentifikuar shtetasi Zoi Jani Dhima, banues në Gjashtë-Sarandë, shkruan Panorama.
Plumbat kanë ardhur nga një skaf që erdhi nga deti, dhe në ngjarje ka mbetur i plagosur edhe shtetasi Leonadro Lapa. Pasi janë kryer veprimet hetimore dhe nuk është arritur të identifikohet autori i vrasjes, me vendimin e datës 13.07.1998, është pezulluar kjo çështje dhe i ka kaluar për veprime hetimore Komisariatit të Policisë Sarandë, për shkak së nuk është bërë i mundur identifikimi i autorit të kryerjes së veprës penale.
Në referencë të nenit 66, paragrafi i parë, gërma b , të Kodit Penal sipas të cilit “Nuk mund të bëhen ndjekje penale kur nga kryerja e veprës deri në çastin e marrjes së personit si të pandehur kanë kaluar njëzet vjet për krimet që parashikojnë dënim jo më të ulët se dhjetë vjet burgim ose dënim tjetër më të rëndë.
