Një nga aleatët e PD, Nard Ndoka, tha se reforma zgjedhore nuk kryhet me pazare politike. Në studion e “Ora News”, Ndoka kërkoi nga Basha që të tregohet i sinqertë me partitë e koalicionit. Sipas tij, kjo forcë nuk e ka luksin që të bëjë manovra.
“PD besoj që e ka kuptuar gabimin e vetë, se reforma zgjedhore nuk kryhet nëpërmjet pazareve politike. Nuk kryhet që dy parti politike vendosin se kush do të jetë gara për të garuar gjithë faktori politik.
Kjo është një mendësi primitive e gabuar, dhe ka rezultuar e dështuar për të dyja palët. Një kosto jo të vogël ka edhe PD. Ndaj, shpresoj që edhe Basha do të reflektojë nën frymën e një konsensusi, në radhë të parë me partitë opozitare.
Shpresoj që PD do tregohet e sinqertë me aleatët e vetë, edhe nuk e ka luksin që të bëjnë përsëri manovra. Ç’ka do ta nxirrte atë të zbuluar edhe përballë aktorëve të tjerë politikë, por edhe në sytë e qytetarëve.
Kështu që Basha e ka mision politik edhe harmonizimin e problematikës që ekziston mes partive politike opozitare. Duke vendosur një standard të besueshëm për gjithë politikën”.
