Khabib Nurmagomedov mposhti në oktagon Conor McGregor dhe mbrojti me sukses titullin kampion bote në artet marciale mikse. Pas ndeshjes pati një përleshje të madhe mes dy skuadrave nga e cila pritet të ketë dënime të ashpra, madje mund të shkojë deri në heqjen e titullit.
Boksieri amerikan Floyd Maywether, që pak kohë më parë është përballur me McGregor ka folur për këtë përplasje jashtë kafazit dhe është shprehur se dënimi do të jetë shumë i rëndë për rusin. Por menjëherë ka ardhur përgjigja e Khabib i cili e ka sfiduar në një duel.
Përmes një videoje në Instagram, Khabib shprehet: “Në xhungël ka vend vetëm për një mbret. Eja Floyd, le të duelojmë së bashku. Ti je 50-0, unë 27-0. Jemi dy sportistë që nuk kanë humbur asnjëherë. Le të përballemi, mos refuzo.”
Më tej, rusi vazhdoi duke bërë presion për boksierin amerikan. Khabib tha: “Natyrisht që ai mbret i vetëm në xhungël do të jem unë. Ti nuk arrite ta hedhësh dot në tapet Conor, ndërsa unë e shkatërrova shumë lehtësisht. Eja të duelojmë.”
Pra, duket se po projektohet një tjetër përballje e madhe mes një boksieri dhe një sportisti të UFC-së, ashtu sikurse ndodhi një vit më parë mes Mayweather dhe McGregor.
Por këtë herë kampioni i pamposhtur i ringut do të përballet me rusin e pamposhtur të kafazit, Nurmagomedov, në një sfidë që pritet të vendosë të tjera rekorde shikueshmërie e natyrisht të ardhurash.
