Avokati i Albert Veliut në Kosovë, Tom Gashi ka publikuar faksimilet e vendimit të Gjykatës së Krimeve të Rënda të Prishtinës. Ajo vendosi këtë të premte t’i kthejë lirinë Albert Veliut. Një vendim i tillë u mor një ditë pas arrestimit.
Gashi publikoi në “Facebook” edhe një fotografi në zyrën e tij. Aty shfaqet Albert Veliut dhe djalit të këtij të fundit. Në fytyrën e avokatit dhe “Bables” dallohet një buzëqeshje, ndoshta për triumfin ditën e sotme në gjykatë.
Vendimi
Vendimi i gjykatës së Prishtinës mban firmën e gjyqtarit Alltën Murselli. Përfaqësuesi i akuzës, prokurori Hivzi Bajraktari ka kërkuar masën “arrest me burg” për Veliun me qëllim ekstradimin në Shqipëri. Në bazë të urdhër-arrestit të lëshuar nga autoritet shqiptare, që e akuzojnë për veprat penale kallëzim të rremë në bashkëpunim dhe kalim i paligjshëm i kufirit.
Vetë Veliu, sipas dokumentit, ka kundërshtuar masën e kërkuar nga organi i akuzës. Ai ka thënë se ka kërkuar azil në Kosovë pasi në Shqipëri i rrezikohet jeta. Argument, ky që u përmend edhe nga avokati.
Avokati Tom Gashi, në mbrojtën e tij, ka thënë ndër të tjera se, nëse klienti i tij mbahet në burg, ky do të ishte “skandali më i madh juridik pas skandalit të mëhershëm të paprecedent”, të dëbimit të gjashtë gylenistëve nga Kosova në Turqi, ngjarje e ndodhur disa muaj më parë.
“Prokuroria ende nuk ka përpiluar apo nuk ka dorëzuar një kërkesë për procedurë të ekstradimit, që i bie që kërkon ekstradimin e klientit për veprime eventuale të cilat mund ti ndërmarrë në të ardhmen, me qëllim të drejtë, pa mëdyshje, ky më pak sa tepër specifike të kërkohet paraburgimi i tij personi që ka kërkuar azil politik në Kosovë që nga Maji i këtij viti dhe të cilit i është dhënë strehim – i është lëshuar certifikata e statusit të azilkërkuesit, dhe deri sa institucionet kompetente të departamentit për shtetësi dhe emigrim të vendosin, lidhur me dhënin e azilit apo jo, paraburgimit eventual i Albert Veliut mund të konsiderohet si skandali më i madh juridik pas skandalit të mëhershëm paprecedent të dëbimit të gjashtë shtetasve turq në Turqi pa kurrfarë procedure ligjore”. Në fund, gjykata vendosi lirimin e Albert Veliut.
