Ish-drejtori i Arkivit në Ministrinë e Brendshme, historiani Kastriot Dervishi në një postim në rrjetin social “Facebook” shkruan se administrata e kohës së sotme është ndër më të dobëtat në historinë e shtetit shqiptar.
Historiani shpjegon se mjafton të shohësh konceptimin e përpilimin e dokumenteve zyrtare për të kuptuar derexhenë e nivelin qesharak ku ndodhet ky shtet.
Dervishi thotë se zyrtarët e qeverisë nënshkruajnë në lloj-lloj formatesh padijeninë e tyre për veprimin e parë që duhet të dijë një zyrtar, korrektësinë me shkresat zyrtare.
Më tej historiani shpjegon se ka përzgjedhur disa lloje shkresash, por këto skandale janë me mijëra e prodhohen përditë në institucionet e këtij shteti që as e di dhe as e ka në mend që duhet të ndërtojë arkivat e veta.
Nuk ka asnjë dyshim se administrata e kohës së sotme është ndër më të dobëtat në historinë e shtetit shqiptar. Mjafton të shohësh konceptimin e përpilimin e dokumenteve zyrtare për të kuptuar derexhenë e nivelin qesharak ku ndodhet ky shtet. Nuk ka gjë më zbavitëse për mua teksa shoh ata që gdhihen e ngrysen vetëm në propagandë, kur nënshkruajnë në lloj-lloj formatesh padijeninë e tyre për veprimin e parë që duhet të dijë një zyrtar, korrektësinë me shkresat zyrtare. Për t’iu dukur vetja të rëndësishëm, në pjesën e sipërme të shkresës që është poshtë intestimit “Republika e Shqipërisë”, vendosin funksionin e vet. Kjo vërehet në trajtat: Ministri, zëvendësministri, kryetari, sekretari i përgjithshëm dhe drejtori i përgjithshëm. E kujtojnë veten se janë institucione (meriton një hahaha të madhe). Lëre pastaj pushteti vendor që është një estradë më vete. Republika e Shqipërisë figuron me qindra stema të çuditshme, me kafshë, me kala, me pemishte, sende, shishe rakie, kanistra, godina, etj, të cilat duhet t’i bëjnë të gjitha praktikat të pavlefshme. As bashkitë dhe as qarqet nuk e dinë se Republika e Shqipërisë ka vetëm një stemë. Lëre pastaj të dinë më shumë.
Për të përpiluar një shkresë zyrtare duhet të bazohemi te “Normat tekniko-profesionale dhe metodologjike të shërbimit arkivor në Republikën e Shqipërisë”, miratuar me vendimin nr.1, datë 16.1.2004 të Këshillit të Lartë të Arkivave (kapitulli II-B, përpilimi, shtypja, shumëfishimi dhe evidencimi i dokumenteve), si dhe së fundmi në vendimin nr.4, datë 19.6.2017 “Rregulloren e njësuar të punës me dokumentet në autoritetet publike të Republikës së Shqipërisë”.
Te “Normat…” është e shkruar fare qartë se dokumentet që nxjerr organi shtetëror duhet të kenë në krye stemën e republikës, intestimin “Republika e Shqipërisë”, emërtesën e organit shtetëror, numrin e regjistrit të korrespondencës, vendin dhe datën.
Kam përzgjedhur disa lloje shkresash, por këto skandale janë me mijëra e prodhohen përditë në institucionet e këtij shteti që as e di dhe as e ka në mend që duhet të ndërtojë arkivat e veta.
