Ministria e Drejtësisë ka konfirmuar shkarkimin e drejtorit të Policisë së Burgjeve për shkak të Ervis Martinajt. Në një njoftim për shtyp, ministria njofton se drejtori Enrik Sulejmani u shkarkua me motivacionin “Për mospërmbushje të detyrave funksionale”.
Veç kësaj, Martinaj duket se ka futur në telashe edhe Spitalin Amerikan 2, ku ai ka qenë i shtruar. Kjo pasi personeli i këtij spitali ka refuzuar të firmosë fletëdaljen duke krijuar një situatë të tensionuar brenda ambienteve të spitalit.
“Përveç masës ndaj Drejtorit të Policisë së burgjeve, Drejtoria e Përgjithshme e Burgjeve ka kryer kallëzim penal ndaj Spitalit Amerikan 2, të cilët në kundërshtim me ligjin kanë penguar zbatimin e vendimit të Gjykatës për masën e sigurisë ndaj shtetasit Ervis Martinaj”, shkruhet ndër të tjera në njoftimin e ministrisë.
DEKLARATA e MINISTRISË SË DREJTËSISË
Ministrja e Drejtësisë ka aprovuar propozimin e Drejtorit të Përgjithshëm të Burgjeve për largimin nga detyra të Drejtorit të Policisë së Burgjeve, Enrik Sulejmani me motivacionin “Për mospërmbushje të detyrave funksionale”.
Ky vendim është marrë për shkak të mosekzekutimit të vendimit nr.1878, datë 07.10.2018 të Gjykatës së Rrethit Gjyqësor Tiranë për vendosjen e masën së sigurimit “arrest me burg” për shtetasin Elvis Martinaj. Ky shtetas për shkak të gjendjes shëndetësore ishte akomoduar në ambientet e Spitalit Amerikan.
Bazuar në vlerësimin e Institucionit të Mjekësisë Ligjore ka rezultuar se në gjendjen shëndetësore në të cilën ndodhet i paraburgosuri, trajtimi i tij mund të kryhet në Qendrën Spitalore të Burgjeve.
Forcat Operacionale që kanë shkuar mëngjesin e datës 9 tetor 2018 në mjediset e Spitalit Amerikan për të kryer shoqërimin dhe marrjen në ruajtje të të paraburgosurit Elvis Martinaj, kanë hasur në pengesat e shkaktuara nga personeli i spitalit, të cilët nuk kanë plotësuar dokumentacionin e kartelës shëndetësore të të paraburgosurit Elvis Martinaj.
Për moszbatim të vendimit të gjykatës me masën e sigurisë ‘arrest në burg’ për Martinaj, është kryer shkarkimi i Drejtorit të Policisë së Burgjeve, Enrik Sulejmani, me motivacionin e mospërmbushjes së detyrave funksionale sipas ligjit në fuqi.
Shtetasi Elvis Martinaj është shoqëruar në mjediset e Qendrës Spitalore të Burgjeve vetëm në mbrëmjen e datës 9 tetor.
Përveç masës ndaj Drejtorit të Policisë së burgjeve, Drejtoria e Përgjithshme e Burgjeve ka kryer kallëzim penal ndaj Spitalit Amerikan 2, të cilët në kundërshtim me ligjin kanë penguar zbatimin e vendimit të Gjykatës për masën e sigurisë ndaj shtetasit Elvis Martini.
Qeveria Shqiptare siguron çdo qytetar se ligji është i barabartë për të gjithë dhe kushdo që bëhet pengesë për zbatimin e tij do të marrë përgjigje shembullore.
