Teksa policia është larguar në orët e para të mëngjesit, në familjen Muça, ku ndodhi shpërthimi me tritol, familjarët janë të tronditur. Ata shprehen për Tirana Today se nuk kanë konflikte me asnjë njeri dhe se nuk e dinë cilët janë autorët. Vëllai i gjyshit të Xhisielës shprehet se nuk kanë marrë asnjëherë më parë kërcënime. Ndaj nuk dinë kë të fajësojnë.
“Na vunë tritol këtu te shtëpia, por ne nuk dimë asgjë. Unë frikë nuk kam sepse nuk i kam bërë gjë ndokujt. Por, jemi të tronditur, nuk e kuptuam nga na erdhi. Ne nuk kemi ndonjë pasuri. Madje ne mezi rrojmë me bukë. Kur ndodhi shpërthimi unë isha duke fjetur dhe dolëm menjëherë, por nuk pamë asnjë njeri pranë. Ne nuk e dimë se kush e vuri tritolin, as nëse ka qenë sulm ndaj Xhiseielës apo jo. Ose kanë dashur t’i prishin makinën, por ne nuk kemi konflikte me asnjë njeri. Nuk na kanë kërcënuar asnjëherë më parë, ne nuk i kemi bërë asnjë gjë.”
Ndërkohë gjyshja e Xhisielës e irrituar dhe e trembur thotë se nuk e dinë prej kujt të ruhen. Duke shtuar se ndjehen të kërcënuar.
“Na ka ardhur në majë të hundës e gjitha kjo. Ne nuk i kemi bërë asnjë gjë askujt, nuk kemi bërë kurrë fjalë. Gjithmonë kemi shkuar mirë me të gjithë. Le të ndodhë çfarë të dojë tani, ne nuk dimë asgjë.”
Gjyshi i Xhisielës, Ramazan Muça refuzon të flasë. Duke thënë se gjithë këto gjëra po i shkaktojnë shumë stres familjes. Ata kërkojnë t’i lënë të qetë dhe të mos i kërcënojnë më. TIRANA TODAY
