Në muajin e sindromës Down, mesazhet sensibilizuese janë prioritare. Në mesin e personazheve publik, është dhe bashkëshortja e këngëtarit të ndjerë Dr.Flori, e cila përmes një postimi të fundit të saj në Instagram, ka vendosur që në disa rreshta të na njohë me historinë e të birit, Daniel Kondi, nga ngjizja e tij e deri tek lindja dhe të jetuarit çdo ditë me një fëmijë me sindromën Down.
Ajo ka ndarë me ndjekësit një mesazh prekës, ku ndër të tjera përcjell edhe emocionet që ka përjetuar gjatë këtyre viteve, e madje edhe çfarë ka ndjerë bashkëshorti i saj i ndjerë. Në fund ajo e mbyll duke thënë se kromozomi i djalit nuk e zvogëloi dashurinë e Dr.Florit për të, por ndodhi krejt e kundërta.
“Unë quhem Daniel Kondi, dhe jam vetëm 15 muajsh. Babi im mori vesh gjithçka 3 ditë përpara se unë të nisja rrugëtimin tim në barkun e mamit, madje edhe emrin tim Daniel që më pëlqen kaq shumë. Rrugëtimi im ishte shumë i bukur, siç është i të gjitha bebeve! Mami im më shihte shpesh kur unë isha tek barku i saj përmes ekos…
Kisha vetëm 4 muaj që isha krijuar, kur mjeku i tha mamit dhe babit se kocka e hundës time nuk dallohej mirë dhe unë mund të kisha një kromozom më shumë se fëmijët e tjerë…I dëgjoja tek diskutonin me njëri-tjetrin, madje shpesh herë edhe qanin…por ata ishin mami e babi im ndaj vendosën që unë të vazhdoja të isha bebja e tyre dhe pavarësisht çdo gjëje do më donin shumë.
Ditën që erdha në jetë nuk do ta harroj kurrë që babi më mori në krahë dhe tha: “Daniel, babi të do shumë shumë, ti je shumë i çmuar për mua!”. A nuk kam të drejtë të mburrem me babin tim? A nuk kam të drejtë të them se ai është heroi im? Ai sot nuk jeton më, por ja ku jam unë që jetoj për të! Kromozomi im nuk e zvogëloi dashurinë e tij për mua, përkundrazi e shtoi edhe më shumë”.
