Barcelona vazhdon të zhgënjejë në La Liga, pasi është ngalur në një barazim 1-1 në shtëpi ndaj Athletic Bilbao-s. Është ndeshja e tretë radhazi që të besuarit e Ernesto Valverde nuk arrijnë të fitojnë, pasi kanë marrë dy barazime dhe një humbje. Tashmë kampionët në fuqi rrezikojnë të humbasin edhe kreun, nëse Real Madrid fiton derbin sonte përballë Atleticos.
Takimi i luajtur në “Camp Nou” ka filluar me një surprizë, teksa trajneri Valverde ka vendosur ta lërë në stol Leo Messi-n, i cili është aktivizuar në minutën e 55-të në vend të Vidal, kur katalanasit ishin në disavantazh 1-0 pas një goli të realizuar nga De Marcos katër minuta para fundit të pjesës së parë.
Vendasit kanë arritur ta shmangin humbjen falë golit të shënuar në minutën e 84-t nga El Haddadi, me Messi-n që ka dhënë asistin. Katalansit kanë kërkuar golin e fitores në minutata e fundit, por pa arritur ta gjejnë atë. Tani topi i kalon Real-it dhe Atletico-s, me këta të fundit që do ta kapnin ekipin e Valverde në kreun e renditjes në rast fitoreje.
