Analisti Kim Mehmeti, mjaft i revoltuar me klasën politike shqiptare, është i mendimit se atyre nuk u intereson toka jonë, por mendojnë vetëm për të ardhurat e tyre. I ftuar në studion e “Top Talk”, ai dha një akuzë mjaft të rëndë, ku tha se politikanëve “u leverdis që të kemi 5 Shqipëri”.
“Ne kemi politikanë që vishen me Versaçe, por mendësinë e kanë të Konferencës së Londrës në 1913. Është e paimagjinueshme që mos të ketë një mendësi mbarëshqiptare, se si do të zgjidhet problemi shqiptar në Maqedoni; na konsiderojnë aq budallenj sa të besojmë se Serbia do ia japë Luginën e Preshevës si dhuratë Kosovës; nuk e beson askush se kryeministri i Shqipërisë do e hapë temën e Çamërisë te kryeministri grek…
Ne nuk kemi të kaluar të përbashkët, sepse jetuam në shtëpi të ndara, por as të sotme të përbashkët nuk krijuam. Politikanëve u leverdis që të kemi 5 Shqipëri”, tha Mehmeti.
Në lidhje me çështjen e korrigjimit të kufijve Kosovë-Serbi, Mehmeti u shpreh se kjo është një ide serbe, e ndërsa Thaçi kërkon që të shpëtojë veten.
“Shkëmbimi i territoreve është ide serbe. Hashim Thaçi kërkon të shpëtojë veten. Kudo në mediat kosovare përmendet për Gjykatën Speciale. Ka disa gjëra që do të zbulohen, pasi disa njerëz të dalin të përgjigjjen për atë që ka ndodhur”.
