Në një konferencë për shtyp, Ministrja e Mbrojtjes, Olta Xhaçka, tha se vendi ynë po përballet me një ‘fenomen paradoksal dhe kriminal’ të zjarrvënieve të qëllimshme, gjatë muajit shtator. Arsyet e zjarrvënies janë të ndryshme, ku nuk përjashtohet për shkak të konflikteve mbi pronën, apo zjarrvënie me qëllim krijimin e hapësirave për toka të reja.
Pas një sezoni veror që kaloi pa vatra zjarresh masive, tashmë zjarret janë në masë. Ajo tha se “vetëm në harkun kohor 10 – 27 shtator janë verifikuar gjithsej 91 vatra zjarri, prej të cilave janë djegur një sipërfaqe prej 262 ha kullotë, shkurre, livadh, pyje, pemëtari, tokë bujqësore, bazë ushqimore për bagëtinë etj. Janë djegur 1162 rrënjë ulliri të vjetër dhe të rinj.
“Informacionet tona flasin për zjarrvënie të qëllimshme nga persona me tendenca kriminale, zjarrvënie të qëllimshme për arsye të konflikteve mbi pronën, apo zjarrvënie me qëllim krijimin e hapësirave për toka të reja, sipas bestytnisë se djegia e tokës sjell pasurimin dhe pjellorinë e saj”.
Ministrja tha se është në kontakt të vazhdueshëm me Policinë e Shtetit, dhe se po punojnë për të evidentuar zjarrvënësit dhe për t’i vënë ata përpara përgjegjësisë ligjore.
“Ne jemi të vendosur të mos tolerojmë asnjë veprim abuziv, dhe të pa përgjegjshëm që do të shkaktojë zjarre dhe dëme në territorin e vendit tonë”.
