Autobiografia e Francesco Tottit ka sjellë një “furtunë” në futbollin italian. Libri “Një kapiten” ka një pasazh ku ish-numri 10, tashmë drejtues i zonës sportive në klubin e kryeqytetit, nënvizohet se ka qenë pikërisht Franko Baldini, ish-krahu i djathtë i presidentit Palota, ai që kishte kërkuar me forcë që Totti t’i jepte fund futbollit, të paktën në skuadrën e Romës.
Dhe duke qenë se Totti as që donte të vishte një tjetër fanellë në jetën e tij, ai vendosi që të paralajmëronte lamtumirën nga futbolli, jashtë dëshirës së tij me sa duket, duke parë se kishte një rival si Baldini në rangjet drejtuese. Kaq mjaftoi dhe pas Tottit, edhe Baldini është detyruar të japë dorëheqjen, duke nënvizuar: “Përderisa kapiteni i Romës e ka thënë këtë, është e kotë që unë të them versionin tim. Askush nuk do ta besojë”.
Legjenda e Romës ka rikujtuar ndeshjen e Italisë në Kupën e Botës 2006 ndaj Republikës Çeke ku është përballur me Nedved. “Atë ndeshje Nedved ishte i papërmbajtshëm, më dhemb ta them këtë gjë pasi nuk e duroja dot në fushë,” shkruan Totti.
“Ai ishte një qaraman. Pak ta prekje fluturonte 10 metra. Të bënte ta godisje me grushte. Por ai ishte shumë i mirë. Në atë ndeshje ishte akoma më mirë se zakonisht dhe Buffon duhet të bënte tre-katër pritje të nivelit të lartë për ta ndalur.
Nuk e kam fshehur asnjëherë antipatinë që kam për të, gjithsesi, ai u soll shumë mirë kur u takuam gjatë shortit të Champions League në Monte Carlo.”
