“Çështja Ozil” duket se nuk do të mbyllet ndonjëherë, pasi herë pas here ka deklarata nga të dyja palët. Këtë herë ai që ka folur është Presidenti turk Recep Tayyip Erdogan. Ai e ka kritikuar Gjermaninë për sjelljen e pakuptimtë që kishte ndaj Mesut Ozil dhe Ilkay Gundogan.
Të dy futbollistët janë me origjinë turk dhe para se të fillonte Botërori i Rusisë janë kritikuar ashpër për disa foto me presidentin Erdogan, me të cilin ishin takuar në një event në Londër ku i kishin dhuruar edhe nga një bluzë. Më pas situata degradoi deri në atë pikë që Ozil të jepte dorëheqjen nga kombëtarja gjermane dhe të lëshonte një lumë akuzash për racizëm.
“Nuk ka asgjë për t’u penduar,” shprehet Erdogan për Funke Mediengruppe. “Siç e dini, Lothar Matthaus është takuar me Vladimir Putin. Më vjen çudi që njerëzit na kanë kritikuar. Jemi takuar në disa raste. Ne gjithashtu takojmë qytetarë turq që jetojnë jashtë shtetit. Ozil jeton në Londër, përse mos ta takoj kur jam andej?
Ozil dhe Gundogan mund të mendojnë se i përkasin të dy shteteve; atij ku kanë lindur dhe atij ku kanë lindur prindërit e tyre. Më duket një sjellje e pakuptimtë dhe mendoj se kjo tregon se në Gjermani ka standarde të dyfishtë.”
