Gjatë mbledhjes së Këshillit të Legjislacionit dhe Komisionit të Ligjeve, opozitarët thyen bojkotin e institucioneve kur u shqyrtua nisma e tyre për Vettingun në politikë. Partia Demokratike nëpërmjet deputetëve Oerd Bylykbashi dhe Enkelejd Alibeaj, thanë se nuk mund të ketë më trajtim special për politikanët.
Alibeaj u shpreh skeptik për vullnetin e mazhorancës që t’i japë “ok” amendamenteve të propozuara prej tyre. Përfaqësuesi tjetër demokrat, Oerd Bylykbashi tha se Vettingu për politikanët duhet të bëhet njësoj si për prokurorët, gjyqtarët dhe policët.
Sipas tij, ekziston një listë me politikanë që jo vetëm duhet të verifikohen, por duhet t’ju ndërpritet mandati për shkak të lidhjeve të tyre me krimin. Ai përmendi rastin Tahiri, Xhafaj, Balla. Ndodhur në këto kushte, ata kërkojnë Vetting për ta, njësoj si për prokurorët, gjykatësit dhe policët.
“Politikanë të lidhur me krimin, i kanë hapur derën hyrjes së krimit në këtë institucion. Kemi një listë të zezë politikanësh, për shkak të lidhjeve të tyre familjare me kriminelë, rasti Tahiri dhe pastaj Xhafaj që janë përfaqësues të këtij parlamenti. Kemi edhe nga ata që deklarojnë miqësi familjare me kriminelë droge dhe këta trafikantë marrin tendera publikë, rasti Balla. Prandaj kërkojmë Vetting për ta, njësoj si për prokurorët, gjykatësit dhe policët. Politikanë, deputetë, ministra, kryetarë bashkish, drejtues institucionesh kushtetuese nuk mund të marrin trajtime speciale. Për ta duhet të përdoret i njëjti mekanizëm pastrimi, si për policin e thjeshtë, ashtu edhe për Ministrin e Brendshëm”.
