I pranishëm në konferencën ballkanike të organizuar nga LDGSH, në bashkëpunim me Forumin e Gruas në PPE, kryetari i PD-së, Lulzim Basha, ka apeluar ndaj ndërkombëtarëve, që të ndërhyjnë për ndryshimin e gjendjes në Shqipëri. Sipas tij, qeveria nuk e ka më kontrollin e territorit dhe të ekonomisë, dhe se është bërë njësh me krimin.
“Krimi kontrollon qytetet, lagjet e qyteteve. Është krimi që kontrollon territorin dhe ekonominë, qeveria nuk e ka më kontrollin e territorit dhe ekonomisë”, tha Basha.
Ai nuk foli me emra konkretë, por tha se askush nuk u beson më fjalëve të zyrtarëve të caktuar të Bashkimit Evropian, që vazhdojnë të përkrahin kryeministrin dhe reformat e qeverisë, përmes shprehjeve të përsëritura. Basha shtoi më tej se Evropa nuk i toleron politikanët e lidhur me krimin.
“Nuk mund të vazhdojmë më kështu. Kusht kryesor është ndarja e Shqipërisë nga krimi. Askush nuk ka nevojë në këtë vend dhe askush nuk i merr seriozisht ata që janë bashkëpërgjegjës në këtë situatë, ata që kanë lejuar Edi Ramën të përqendrojnë në një dorë gjithë pushtetet.
Askush nuk i ha më frazat për thellim dhe intensifikim të reformave, sepse institucionet i ka kapur krimi. T’i bëjmë thirrje atyre që flasin në emër të Evropës, mos na gënjejnë më.
Mos të flasin me patate në gojë, por ta thonë qartë. Evropa nuk i toleron politikanët e lidhur me krimin. E kanë thënë qartë drejtues të lartë të politikës gjermane, është koha ta thonë të gjithë”, deklaroi kryetari i Partisë Demokratike.
