Interi ka bërë një rikthim të çmendur në Champions League, pasi ka përmbysur rezultatin përballë një kundërshtari të fortë si Tottenham. Edhe pse zikaltërit dominuan ndeshjen që nga fillimi, golin e parë e gjetën “Spursat” me Eriksen.
Deri në minutën e 85’ Interi vuan shumë, por është kapiteni Icardi që merr përsipër të ndryshojë situatën dhe të shënojë një gol fantastik. Argjentinasi debutoi me këtë ndeshje në Champions dhe e bëri si një bomber i vërtetë. Pas ndeshjes, kapiteni i zikaltërve shpreh euforinë dhe emocionet e atij momenti.
“Asamoah më dha një top fantastik dhe në fund, gjithçka përfundoi me sukses, duke e dërguar në rrjetë. Një natë spektakolare, bëmë atë që duhej të bënim. Kemi një skuadër të fortë, dhe mund të luajmë me këdo, pavarësisht atij starti që kemi bërë në kampionat.
E kemi pritur këtë ndeshje prej tri muajsh, kështu që pas kësaj fitoreje, kemi akoma më shumë forcë për t’u përmirësuar edhe në kampionat. Fitorja na jep forcë të ecim përpara, por duhet të mbetemi të qetë. Nuk e di nëse është ndeshja e kthimit për ne, por të shtunën është e sigurt që do luajmë një ndeshje me mentalitet tjetër nga ato që kemi luajtur këto 4 javët e para.” – deklaroi Icardi.
