Pas pushimeve, klasa politike i është rikthyer fuqishëm punës. Avazi ka vijuar me të njëjtat ritme, duke mos munguar akuzat, të cilat janë kthyer në një mjet të fortë për të mbrojtur veten.
Gjatë mbledhjes së Konferencës së Kryetarëve, kreu i grupit parlamentar të PD-së, Edmond Spaho, ka denoncuar nivelin e lartë të kriminalitetit dhe vrasjet e ndodhura në vend gjatë këtyre javëve.
Në mbledhjen me dyer të mbyllura, Spaho është shprehur se deputetët janë të lidhur me krimin, ndërsa ka deklaruar se Taulant Balla nuk mund të jetë pjesë e Konferencës së Kryetarëve, pasi ka lidhje me një të dënuar për ‘trafik droge’. Po kështu ai ka shtuar se Reforma në Drejtësi është një dështim total.
“Deputetët janë të lidhur me krimin. Qeveria drejtohet nga krimi dhe droga.
Taulant Balla ka lidhje me të dënuarin për ‘trafik droge’, nuk duhet të jetë pjesë e Konferencës së Kryetarëve.
Reforma në Drejtësi ka dështuar”, mësohet të jetë shprehur Spaho, gjatë mbledhjes.
Ndërkohë, në një prononcim për mediat, pas përfundimit të mbledhjes, Spaho ka bërë të ditur atë se ai çfarë deklaroi në Konferencën e Kryetarëve. Ai tha ndër të tjera se ka ngritur si shqetësim shtrirjen e krimit në shumë qytete. Po kështu nuk mund të mungonte edhe rasti i gazetares Klodiana Lala.
“Ngrita shqetësimin për shtrirjen e krimit në qytetet kryesore të vendit, në Elbasan, Shkodër, Vlorë, Durrës, si dhe kriminalizimin e qeverisjes, sepse kjo gjendje është rezultat i një qeverie të kriminalizuar.
Solla në vëmendje sulmin ndaj gazetares Klodiana Lala, e cila është pika kulmore e asaj politike konstante që ka ndjekur Rama në denigrimin dhe luftën e ashpër që ka zhvilluar ndaj përfaqësuesve të shtypit, që nuk kanë qenë në unison me qëndrimet e tij.
Solla në vëmendje rastet e freskëta të krimit, solla në vëmendje rastin e Taulant Ballës që ka lidhje me një person të dënuar me 21 vite burg. Tërhoqa vëmendjen e rastit Jurgis Çyrbja”, u shpreh ndër të tjerash Spaho.
