Manchester United fitoi sot përballë Burnley, një fitore që ka rikthyer qetësinë në kampin e “Djajve”. Në fillim të ndeshjes në qiell u shfaq një parullë kundër shefit ekzekutiv të klubit, Ed Woodward ku shkruhet: “Je një specialist në dështime”.
Nga ana tjetër Mourinho ka fituar simpatinë dhe besimin e tifozëve pas humbjes me Tottenham dhe sot është afruar sërish pran tyre duke u dhuruar xhupin që mbante veshur. Ndërsa në konferencën pas ndeshjes trajneri portugez i ka befasuar të gjithë kur ia ka dedikuar fitoren pikërisht njeriut që ka replikuar më shumë kohët e fundit dhe që është kthyer në “të urryerin” e tifozëve, Ed Woodward.
“Gjatë ndeshjes unë nuk shoh në qiell, vetëm kur i kërkoj zotit ndihmë. Nuk e kam parë aeroplanin, por Ed Woodward fitoi 2-0 sot.
Mendoj se fituam për shkak të humbjes ndaj Tottenham. Kur humbet brenda dhe tifozët të fërshëllejnë, do të reagosh keq. Por kur tifozët të mbështesin, atëherë paraqitja do të jetë e mirë. Jam i lumtur me paraqitjen e ekipit, me rezultatin dhe ndjesinë e tifozëve.”
