24-vjeçari Ritvan Zykaj, autori i krimit makabër, njihej në fshat si tepër “nevrik”. Masakra e Selenicës mund të ishte parandaluar, nëse familja dhe banorët e fshatit do të kishin vlerësuar siç duhet luhatjet emocionale të tij.
Jo vetëm kaq, po ka dyshime se ai mund të ketë pasur edhe probleme të shëndetit mendor. Kjo e dhënë nuk është e konfirmuar nga autoritetet zyrtare. Ndonëse prokurori ka kërkuar një ekspertizë mjekësore për të vërtetuar nëse ka apo jo probleme mendore, deri tani zyrtarisht nuk konfirmohet nëse ka apo jo, shkruan “Panorama”.
Një tjetër element që vë në pikëpyetje shëndetin e tij, është sjellja e tij pas krimit. Edhe pas prangosjes, autori i krimit nuk ka shfaqur pendesë. Pranoi krimin e kryer për shkak se sipas tij, e kishin akuzuar për vjedhjen e disa pulave. Më tej, ai kërkoi një avokat.
Autori i krimit të 8-fishtë, Ritvan Zykaj, menjëherë pas vrasjes ka vënë në dijeni kushëririn e tij. Ai i ka dërguar si provë një video. Pasi ka kryer krimin e rëndë, 24-vjeçari ka bërë një video. Ka filmuar një e nga një viktimat të shtrira dhe ia ka dërguar videon djalit të hallës në “Facebook Messenger”.
