Ish-ministri i Jashtëm, Besnik Mustafaj, në një intervistë të dhënë për “News 24”, ka nxjerë disa sekrete në lidhje me raportin Thaçi-Berisha. Ai ka folur për përplasjen e Hashim Thaçit me Sali Berishën, dhe raportet që këta dy lider kanë patur me njëri-tjetrin. Mustafaj është shprehur se ish-kryeministri Berisha nuk ka patur asnjëherë simpati për Thaçin. Kjo e dhënë është konfidenciale.
“Berisha nuk ushqente simpati personale për Hashim Thaçin. Kjo është konfidenciale”, tha ai.
Sa i përket akuzave që Thaçi lëshoi ndaj Berishës, Mustafaj thotë se në takimet me presidentin kosovar ai nuk i ka shprehur asnjëherë pakënaqësi për ish-kreun e PD-së.
“Me Thaçin jam takuar disa herë, dhe nuk më ka shprehur asnjëherë ndonjë pakënaqësi për Berishën”, tha Besnik Mustafaj.
Përmes një konference të jashtëzakonshme për mediat, Presidenti i Kosovës, Hashim Thaçi, tha se ka kërkuar korrigjimin e kufirit me Serbinë, por mohon se kjo nënkupton ndarje të Kosovës.
“Dua të theksoj se dialogu ka vetëm një qëllim thelbësor, arritjen e marrëveshjes ndërshtetërore paqësore. Unë jam i përkushtuar për arritjen e marrëveshjes, dhe kam propozuar, pas kërkesës së përfaqësuesve të Preshevës, Medvegjës dhe Bujanovcit, për korrigjimin e kufijve. Si një mundësi e vetme që ata t’i bashkohen Kosovës, kjo nënkupton jo ndarje të Kosovës”, tha më tej Thaçi.
