Gjatë këtij sezoni veror janë vënë re mjaft problematika, e të shumtë kanë qenë qytetarët të cilët janë ankuar për rritjen e çmimeve nga bizneset, e mos marrjen e shërbimeve të duhura.
Jo më pak është edhe roli i forcave të policisë dhe parandalimit të ngjarjeve kriminale. Këto problematika sot i ka trajtuar Ministri i Brendshëm Fatmir Xhafaj, gjatë një takimi të mbajtur me strukturat drejtuese të Drejtorisë Vendore të Policisë në Vlorë.
Ministri Xhafaj ka inspektuar edhe Portin e Vlorës, ku këto ditë ka fluks udhëtarësh, për shkak të pushimeve verore. Policia Kufitare në Vlorë pritet të aplikojë lexuesit e lëvizshëm të pasaportave, për të shmangur rradhët në hyrje e dalje në Port, dhe lehtësuar lëvizjen e qytetarëve.
Ministri kërkoi nga autoritetet policore në Port, një shërbim më të mirë dhe komunikim më etik, marrë shkas nga disa njoftime të qytetarëve në Komisariatin Dixhital, dhe mesazhe dërguar atij.
