Greqia po përjeton një situatë dramatike, por për fat të keq edhe shqiptarët janë pjesë e kësaj situate. Pak më herët u raportua për gjetjen e një makine, ku dyshohet se një person nga Tepelena mund të ndodhej brenda.
Ndërkohë që të plagosurit janë me qindra, mes tyre janë edhe 13 shqiptarë, ndërsa njëri dyshohet se ka humbur jetën. Lajmi jepet për “Report Tv” nga një dëshmitar nga vendi i ngjarjes.
Emigranti shqiptar Mondi Sinaj, në një lidhje telefonike për “Report Tv” nga Athina, shprehet se në zonën që ka rënë zjarri kishte shumë shqiptarë që punonin në banesat që janë djegur, ndërsa nga informacionet e para janë 13 të lënduar. Përsa i përket shqiptarit që dyshohet se ka humbur jetën, ai është nga Tepelena dhe sipas Sinajt, nuk arriti që të dalë nga makina.
https://tiranatoday.com/flaket-shkrumbojne-makinen-e-shqiptarit-ne-greqi-brenda-saj-gjendet-nje-viktime/
“Në fakt, në zonën e zjarreve ka pasur shumë shqiptarë të cilët punojnë nëpër shtëpitë e grekëve. Kemi informacion se 13 shqiptarë janë lënduar nga flakët. Kam folur me shumë prej tyre. Deri nga darka besoj se do të kemi informacion të plotë. Flitet edhe për një djalë nga Tepelena që dyshohet se është djegur në makinën e tij, por nuk e dimë 100% të saktë.
Kemi pasur shumë ndihmë nga ambasada. Janë interesuar deri vonë në orët e mbrëmjes. Zjarret kanë rënë kudo në Athinë, në të gjitha anët. Kam parë gra dhe fëmijë që vuajnë dhe digjen, është diçka që nuk përshkruhet me fjalë, kam parë masakër me sy.
Ato që hoqëm dje nuk mund të përshkruhen dot. Njerëzit u hodhën në det për të shpëtuar. Është diçka e tmerrshme”.
Ku ndodheshit ju?
“Unë isha në shtëpi dhe u interesova për njerëzit që njihja. Zjarri ishte me shpejtësi, për shkak të erës”.
Dyshohet se bilanci përfundimtar do të përfshijë më shumë të vdekur, pasi pranë shërbimeve përkatëse janë bërë dhjetra telefonata nga të afërm, për të deklaruar persona të zhdukur.
Qeveria shpalli gjendjen e jashtëzakonshme, ndërkohë që ka kërkuar edhe ndihmën e Mekanizmit Europian të Mbrojtjes Civile, që u përgjigj menjëherë. Avionë zjarrfikës nga Spanja dhe efektiva nga Qipro pritet t’u bashkohen operacioneve.
Thirrjes për ndihmë i është përgjigjur Qiproja, e cila ka çuar 60 forca zjarrfikëse, Spanja, Italia, Franca dhe Turqia. Zjarret që kanë përfshirë pyjet, ndodhen 55 kilometra në perëndim të Athinës, e po djegin jashtë kontrollit në të dyja anët e kryeqytetit grek, duke shkatërruar shtëpitë dhe duke nxitur banorët të largohen nga banesat e tyre.
