Luftëtari është në qendër të akuzave për ndeshjen e vlefshme për turin e Europa League ndaj letonezëve të Ventspils. Goli i tretë i pësuar në minutat e fundit nga gjirokastritët është cilësuar si një katastrofë dhe aty lindit dyshimet e para për ta cilësuar si një ndeshje të trukuar.
Por kur të gjithë flasin për Luftëtarin portali francez “footballski.fr”, na sjell një profil mjaft interesant të presidentit të ekipit letonez. Ai është një biznesmen rus i akuzuar më parë për trukim ndeshjesh dhe në stafin e tij ka persona të cilët janë dënuar më parë.
Ato janë marrë me të kaluarën e biznesmenit rus, Adlan Shishkhanov, që u bë president i klubit të Ventspils pak vite më parë. Pas vdekjes së ish-presidentit të ekipit letonez, Juri Bespallov, në vitin 2012, te Ventspils u afrua pikërisht rusi Shishkhanov.
“Ai kishte probleme në Moldavi dhe nuk ishte më i mirëpritur atje. Ndaj filloi të kërkonte një klub të ri. Duke llogaritur se vende si Moldavia dhe Letonia kanë lidhje me të kaluarën sovjetike, nuk ishte çudi që një rus u shfaq te Ventspils”, citohej në portalin francez, duke iu referuar gazetarit Ilja Polakovs, i cili ka investiguar për të kaluarën e presidentit rus në Letoni.
“Duke mësuar për të kaluarën e Shishkhanov, tifozët dhe Federata e Futbollit të Letonisë janë treguar të përmbajtur. Edhe sot e kësaj dite janë skeptikë për këtë afrim në futbollin letonez. Në pjesën më të madhe të rasteve, investitorët e huaj kanë ardhur në Letoni për të mashtruar dhe për të organizuar ndeshje të trukuara.
Me mbërritjen e Shishkhanov te Ventspils, të paktën 10 lojtarë letonezë u lanë të lirë, duke u zëvendësuar nga katër që erdhën nga Dacia. Përveç lojtarëve, u ndryshua edhe stafi. Trajneri i portierëve u zëvendësua me Aleksandër Vlasov, një njeri i pezulluar në të kaluarën për ndeshje të trukuara. Presidenti është i lidhur me persona të shumtë në futbollin letonez që kanë një të kaluar në ndeshje të trukuara.
Në fillim kishte zëra se do të merrte kampionët e Spartaks Jurmala, por pastaj zgjodhi Ventspils. Reputacioni i tij nuk është i mirë këtu. Gjatë periudhës në Moldavi, ai kishte lidhje me njerëz në Rusi, të cilët kanë një imazh negativ në futbollin letonez.
Një prej tyre është Oleg Gavrilov, i cili është përjashtuar përjetësisht nga përfshirja në futboll në këtë vend, për shkak të ndeshjeve të trukuara me klubin e Daugavpils. Ne jemi gjithashtu të vetëdijshëm se këto ndeshje europiane janë ideale për t’u manipuluar në baste”, shkruhej në portalin francez që përpara se Ventspils të luante me Luftëtarin.
