LSI-ja zgjodhi që ti bashkohej sot seancës parlamentare, për të kërkuar bashkëpunim me mazhorancën, për të zgjidhur ngërçin në kuadër të Reformës në Drejtësi. Kryetari i Komisionit të Ligjeve, Ulsi Manja, përçoi mesazhin se “nuk ka kthim prapa” dhe “dialog me kushte për të zhbërë Vettingun harrojeni”.
“Po presim me qetësi që opozita ta japë votën për shkollën e Magjistraturës. Nëse nuk e jep, do presim me qetësi ngritjen e institucioneve që ka caktuar Kushtetuta”
Manja thotë se pr/ligji për disa ndryshime lidhur me statusin e prokurorëve dhe gjyqtarëve, i njohur dhe si ligji për Magjistraturën “është shumë i rëndësishëm, i karakterit tërësisht juridik dhe nuk ka asnjë qëllim politik.”
“Është votuar një herë me 84 vota dhe aktualisht duke qenë se dy organet e reja të drejtësisë, KLD dhe KLP janë në krijim e sipër si dy organe të ngarkuara nga Kushtetuta për të bërë emërimin e magjistratëve të rinj dhe përcaktuar kuotat, propozimi ynë synon që ta bëjë direkt ligji në një dispozitë tranzitore”, u shpreh Manja.
“Ne jemi për të kaluar ligjin për shkollën e magjistraturës siç e kemi propozuar. Por nëse opozita do ti përgjigjet ftesës së hapur sy për sy, jo kështu në kulisa. S’ka dialog kulisash, as pazare politike: Më jep këtë, të jap atë. Ftesa është e hapur në sallën e parlamentit. Hajdeni të debatojmë dhe diskutojmë juridikisht për shkollën. Ata në mos u emërofshin tani, do të emërohen sapo të formohen KLGJ dhe KLP.
Ju ftoj të shkoni tek oborri i dy opozitave dhe t’ju thoni profetëve të kolapsimit të sistemit të drejtësisë, hajdeni dhe votojeni ligjin e shkollës së Magjistraturës. Sepse sa shpejt të kuptoni se çfarë është Reforma në Drejtësi dhe Vettingu dhe të zbrisni me këmbë në tokë, aq më mirë do të jetë për opozitën.
Kam një thirrje shumë miqësore: Ju lutem, mos e sulmoni Vettingun dhe Reformën në Drejtësi, mos na i shtoni votat si shumicë, se do të mbeteni pa kokërr vote në zgjedhjet që do të vinë. Drejtësia është thembra e Akilit. Ju lutem shkoni atje dhe thuajuni të zbresin me këmbë në tokë dhe të vinë në sallën e parlamentit”.
LSI, përmes nënkryetarit Luan Rama, kërkoi paraditen e sotme dialog mes aktorëve parlamentarë, për ti dhënë zgjidhje Reformës në Drejtësi, duke propozuar një tryezë tre palëshe. Ndonëse në rend të ditës për votim është ndryshimi në ligjin për statusin e prokurorëve dhe gjyqtarëve, që i hap rrugë hyrjeve në shkollën e Magjistraturës, mungesa e konsensusit mes palëve duket e pamundur.
