Serbia dhe Kosova do të fitojnë vetëm atë për të cilën bien dakord në dialog, tha të premten ambasadori i Shteteve të Bashkuara në Beograd, Kyle Scott.
I pyetur se cili është maksimumi që mund të fitojë Serbia nga bisedimet për zgjidhjen e çështjes së Kosovës, Scott tha se SHBA “vetëm i inkurajon të dyja palët të bëjnë dialog”.
“Ne i inkurajojmë të dyja palët të vijnë deri te kompromisi, sepse pa të nuk ka marrëveshje”, u tha Scott gazetarëve ne Beograd, shkruan Radio Evropa e Lirë.
Presidentët e Kosovës dhe të Serbisë, Hashim Thaçi dhe Aleksandër Vuçiç, kanë zhvilluar më 24 qershor rrethin e fundit të bisedimeve për normalizimin e marrëdhënieve.
Me këto bisedime, që ndërmjetësohet nga Bashkimi Evropian, synohet të arrihet një marrëveshje ligjërisht e obligueshme për normalizimin e raporteve.
