Suedia me shumë vuajtje ka arritur ta mbyllë me fitore ndeshjen e parë përballë Kores së Jugut në Botërorin e Rusisë. Një fitore e artë, pasi kujtojmë që ndodhet në një grup me Gjermaninë e cila u mposht një ditë më parë nga Meksika. Ishte një ndeshje e luftuar fort, sidomos në repartin e mesfushës dhe arbitri nga El Salvadore nuk e kishte aspak të lehtë që ta administronte pasi iu desh të ndalonte lojën shumë herë.
Mbrojtja suedeze njihet tashmë për forcën që kanë, dhe për pathyeshmërinë më mirë e dinë italianët të cilët ngelën jashtë pikërisht prej tyre. Kjo mund të jetë ndeshja e parë më e kontestuar, pasi në pjesën e parë arbitri gaboi në shumë raste me vendimet që mori edhe pse mund të përdorte VAR-in, që është risia e këtij Botërori. Në dy raste të pastra arbitri ka penalizuar Suedinë e cila mund ta zhbllokonte ndeshjen shumë shpejt.
Ishin momentet ato që përcaktuan ndeshjen. Kishte momente ku Suedia luante mirë dhe sulmonte, dhe në disa momente të tjera ishte Koreja që insistonte në kërkim të golit.
Gjithsesi, europianët e kanë merituar fitoren duke parë edhe mundësitë për gol të krijuara. Goli erdhi në minutën e 65’ nga pika e bardhë e penalltisë nga këmba e djathtë e Granqvist. pas golit koreanët u munduan të bënin diçka por pa sukses, Suedia merr tre pikë jetësore.
