Kryeministri Edi Rama u ndal sot në Belsh, ku edhe prezantoi jo vetëm projektet për zhvillimin e Belshit, por edhe një sërë projektesh që do të zbatohen në këtë qark. Ai tha se falë zbatimit të projektit të Rilindjes Urbane, Belshi është kthyer në destinacionin kryesor të turizmit për Shqipërinë e Mesme, por qeveria premton se do të vijojnë investimet për ta transformuar këtë zonë.
“Pamjet e transformimit të Belshit nuk janë pamje të krijuara nga kompjuteri, por pamje të të krijuara nga një punë reale për të zbatuar një projekt transformues siç është projekti i Rilindjes Urbane”, u shpreh Rama.
Por, Rama theksoi se projekti ende nuk ka përfunduar, pasi qëllimi dhe objektivi është që ne të mbyllim edhe pjesën tjetër të liqenit dhe të krijojmë unazën këmbësore të liqenit, duke hapur një perspektivë zhvillimi të turizmit dhe agroturizmit, ku potenciali është shumë i madh.
“Ndërtimi i një agroturizmi është thjesht transformimi i një banese apo strukture të trashëguar më parë me pak terren, në një mikrofermë apo bujtinë dhe me një infrastrukturë të thjeshtë mikpritjeje për vizitorët”, theksoi Kryeministri.
KLSH paditi në fillim të javës në prokurori kryetarin e kësaj bashkie, Arif Tafani. Bashkë me të edhe Drejtorin e Bujqësisë, ish-përgjegjësin e urbanistikës, ish-juristen si dhe tre punonjës të tjerë që kanë mbikëqyrur punimet në të paktën dhjetë projekte të rilindjes urbane.
Dëmi i shkaktuar, sipas KLSH-së është 4.3 miliardë leke, nga të cilat 800 milionë në fushën organizative të projekteve, 2 miliardë e 860 milionë përdorim fondesh pa eficencë dhe të ardhura të munguara 660 milionë lekë.
Sipas verifikimit nga KLSh dilet në përfundimin se firmat fituese nuk plotësonin kriteret e Drejtorisë së Standardeve dhe kryen punime me cilësi të dobët. Një nga këto projekte është edhe pedonalja e Belshit, për të cilën edhe Top Channel ka denoncuar ditë më parë punimet e dobëta në ndërtimin e saj.
KLSH në raportin dërguar prokurorisë thotë se ka gjetur shkelje në 14 procedura në total, nga të cilat 10 prokurimi dhe 4 zbatimi, që të gjitha në fushën e infrastrukturës. Gjatë auditimit u konstatuan shkelje dhe parregullsi të dispozitave ligjore në fushën e prokurimit publik, kryesisht në përzgjedhjen e procedurës së prokurimi, vlerësimin e ofertave ekonomike duke vepruar me dy standarde vlerësimi dhe zbatimin e investimeve.
