Ali Soue shënoi 21 gola këtë sezon në kategorinë Superiore me ekipin e Skënderbeut dhe fitoi “Këpucën e Artë”. Pas paraqitjeve mjaft të mira në Europa League, sulmuesi nga Gambia ka zgjuar interesin e ekipeve të mëdha turke. Soue është i huazuar nga Chievo dhe pas ndeshjes së Kupës me Laçin ai do të udhëtojë drejt Italisë.
Skënderbeu dëshiron ta mbajë në ekip, por do ta ketë të pamundur, sepse në lojë për të është futur së fundit edhe ekipi tjetër turk, Beshiktashi. Trajneri i gjigantëve turq, Senjol Gynesh, e ka pëlqyer qendërsulmuesin afrikan dhe e ka dhënë “ok”-in për ta pasur në ekip. Lajmi është bërë i ditur në shtypin sportiv turk.
Trabzonspori ofronte deri në 200 mijë euro, ndërsa Beshiktashi me siguri mund të ofrojë më shumë, ndërkohë që edhe vetë lojtari do të zgjidhte pa dyshim të dytin. Kjo do të thotë se që tani klubi korçar duhet të mendojë shumë seriozisht për të gjetur zëvendësuesin e Souesë, pasi praktikisht do ta ketë të pamundur ta mbajë, duke pasur parasysh kërkesat për të. Do ta ketë të vështirë të gjejë një Soue të dytë.
