Gazetari investigativ, Jetmir Olldashi ka rrëfyer mënyrën se si kontaktoi me Dëshmitarin X, i njohur si Albert Veliu dhe mënyrën e regjistrimit të audio-përgjimit.
I ftuar në emisionin “Opinion”, Olldashi sqaroi se dëshmitari X, i njohur si Albert Veliu u vetëofrua për të bërë denoncimin.
“Audio-përgjimi është bërë me 24 tetor 2017, ka qenë vetëm një ditë e vetme. Janë regjistruar rreth dy orë e pak. Babalen e takova disa herë në Tiranë, ai shprehu disa gjëra të rënda për trafikun e drogës në Vlorë. Ai u vetëofrua për të bërë denoncimin. Ajo ishte një lloj hakmarrje dhe zëmërimi i brendshëm rreth njerëzve që kishte bashkëpunuar. Kjo kohë përkoi me kohën e arrestimit të Habilajve. Ai u afrua personalisht me më treguar se ku do blihej droga. Ishim vetëm ne të dy. Morëm ca pajisje të thjeshta përgjimi. Shkuam në Vlorë tek lokali i ministrit të Brendshëm, pasi ai mendonte se ishte i përfshirë në trafikun e drogës, por edhe njerëz të afërt gjaku të ministrave të tjerë,” deklaroi Olldashi.
