Vllaznia është pranë rënies në Kategorinë e Parë dhe tifozët shkodranë janë revoltuar ndaj Bashkisë e cila ka në administrim ekipin. Kur shpresat janë minimale dhe Vllaznisë i duhen dy ndere që të vazhdojnë të militojnë në Superiore në Shkodër kanë shpërthyer protestat. Siç njofton “shkodra.news”, më shumë se 50 tifozë u grumbulluan para institucionit të bashkisë dhe shprehën indinjatën e tyre, duke e konsideruar pushtetin vendor si fajtorin e vetëm për këtë situatë.
Me letra higjienike, tymuese dhe vezë të goditura në drejtim të Bashkisë Shkodër, tifozët nuk ngurruan as të lëshojnë fyerje ndaj kryebashkiakes dhe njëkohësisht presidentes së Vllaznisë, Voltana Ademi. Forcat e policisë bashkiake dhe ato të shtetit kanë mbikqyrur gjithçka, për të mos lejuar incidente. Interesant është kërcënimi i tifozëve shkodranë, të cilët thanë se do të bllokojnë edhe stadiumin ditën e nesërme, në sfidën ndaj Kukësit.
