Florian Marku, kampioni shqiptar në MMA më 8 qershor do të zhvillojë duelin e parë për herë të parë në Tiranë në pallatin e sporteve “Asllan Rusi”. Ai do të kërkojë të realizojë ëndrrën e tij, të fitojë para publikut shqiptarë i cili ka premtuar se do të jetë i madh natën e 8 qershorit në pallatin e sporteve. Një triumf përballë serbit Sladan Dragisic, do ta bënte edhe më magjike atë natë.
Marku në 7 vite nuk njeh zhgënjim, por 5 fitore të njëpasnjëshme në ndeshjet në kafaz që njihet si MMA, dhe synon që të arrijë sa më shpejt fitoren e radhës që e afron me federatën e UFC (Ultimate Fighting Championship), nivel në të cilin ai mund të ndeshet me luftëtarët më të fortë në botë. Në të gjitha rastet, kundërshtarët e luftëtarit shqiptar nuk i kanë rezistuar më shumë se dy raunde, ku dy prej tyre janë dorëzuar, ndërsa dy të tjerë i ka mundur me nokaut.
Rivali i Markut, Sladan Dragisic është luftëtar nga Vranje, Serbi dhe në karrierën e tij ka zhvilluar 15 ndeshje. Në këto ndeshje ai është mundur 11 herë, dy prej tyre me nokaut, ndërsa njeh 4 fitore, ku 2 prej tyre me nokaut. Për serbin Dragisic, Floriani nuk është shqiptari i parë me të cilin është ndeshur, pasi me herët është mundur nga Mikel Hodaj, një tjetër luftëtar me origjinë nga Fieri. Hodaj fitoi me pikë në një ndeshje që u zhvillua në Calais, të Francës.
Floriani, i njohur ndryshe me pseudonimin “TNT” ose DINAMITI. Ai është 25 vjeç, 1.72 metër dhe bën pjesë në kategorinë e peshave të lehta, ndërkohë Dragisic është 31 vjec, 75 kg dhe po ashtu bën pjesë në kategorinë e peshave të lehta.
Në një intervistë, Dragisic ka deklaruar se do të vijë në Tiranë për të bërë surprizën, sepse synon fitoren, ndërsa i menjëhershëm ka qenë reagimi i Markut, i cili është shprehur se: Frikën nuk ia kam askujt përveç zotit. E aq më pak mund t’i frikësohem Dragisic-it. Ai ende nuk është ndeshur me një luftëtar si unë, madje nuk e ka parë as në ëndërr. E vetmja surprizë e tij që mund të bëjë, është që nga frika, të na zhduket pak para ndeshjes dhe, unë s’kam pastaj kundër kujt të luftoj”-shtoi ai.
Marku po vijon përgatitjet e tij në Tailandë, vend në të cilin ka udhëtuar prej 26 shkurtit për të kryer përgatitjet për këtë ndeshje, gjithashtu edhe për të ardhmen e tij. Marku ka deklaruar se ka zgjedhur këtë vend për shkak të klimës dhe mënyrës se si po stërvitet me trajnerë vendas, prej të cilëve po mëson teknika të reja dyluftimi.
Nata e 8 qershorit do të rezervojë edhe disa sfida të tjera ku do të përballen sportistë Shqiptarë dhe ndërkombëtarë. Biletat për të ndjekur nga pranë këtë përballje mund t’i siguronin online, pranë pallatit të sportit “Asllan Rusi”, apo në pika të ndryshme në Tiranë, Durrës, Lushnjë, Berat, Librazhd, Korçë, Përrenjas, Vlorë dhe Shkodër.
