Ish-ministri i Drejtësisë nga radhët e LSI-së, Ylli Manjani është takuar sot në mëngjes me ambasadorin amerikan në Tiranë, Donald Lu.
Në një foto që po qarkullon së fundmi në rrjete sociale duket se ata janë takuar në ambientet e Hotel Rogner në kryeqytet.
Takimi vjen një ditë pasi opozita ka publikuar një dosje të vëllait të ministrit të Brendshëm, Fatmir Xhafaj të dënuar me 7 vite burg në Itali për trafik droge.
Por gjithashtu një ditë më parë Prokurorja e Përgjithshme e Përkohshme Arta Marku, ka shkarkuar nga detyra kreun e Prokurorisë së Krimeve të Rënda Besim Hajdarmataj, që është një ndër prokurorët e çështjes Tahiri.
Pak muaj më partë ambasadori amerikan Donald Lu foli me emra kur kritikoi disa politikanë për qasjet e tyre ndaj komunitetit LGBTI.
Ai përmendi ish-ministrin Ylli Manjani, deputetët e PD Tritan Shehu e Oriola Pampuri të cilët sipas Lu duhet të bëjnë kujdes me deklaratat pasi do të japin llogari para elektoratit.
Por kjo me sa duket nuk i pëlqeu ish-ministrit të LSI Manjani i cili ka sulmuar ashpër ambasadorin.
“Në vijim të mos shfokusimit, një përgjigje për Ambasadorin Amerikan që ka më shumë përparsi LGBT:
Edhe unë zoti Lu, po ndjek me vemendje debatin në Amerikë për përfshirjen Tuaj në dorëzimin e Sistemit të Drejtësisë së Shqipërisë në duart e Qeverisë!
Kjo është më e rëndësishme!
Ndjesë që nuk debatoj dot me ty në Kuvend sepse nuk jam deputet!”.
Ndërsa në një tjetër reagim ish-ministri i LSI-së ka dalë kundër ambasadorit amerikan në Tiranë, Donald Lu, që ka dënuar deklaratat e kryeministrit Edi Rama për një president të përbashkët të Shqipërisë dhe Kosovës.
“Heu, qenka zhgënyer Ambasada e USA me Ramën?!
Për një deklaratë të tij që nuk gënjeu askënd.
Po ai votoi kundër Amerikës dhe nuk u zhgënjye Ambasada!
Po për drogat e forta, investimet amerikane, futjen e biznesit rus e lidhjen e ngushtë me Turqinë?!
Ka plot zhgënjime të pa thëna..”, shkruan Ylli Manjani.
Manjani ka qenë mjaft kritik edhe në të shkuarën me ambasadorin Lu, për përfshirjen sipas tij më shumë seç duhet në politikën shqiptare. TIRANA TODAY
