Fran Dashi, avokati i Izet Haxhisë, i cili është ekstraduar një ditë më para nga Turqia drejt vendit tonë, tha se gjykimi ndaj Haxhisë është bërë në mungesë.
Avokati tha se do të rihapet nga e para çështja “Hajdari”, pasi të gjitha gjykimet janë bërë në mungesë të klientit të tij.
“Të gjitha vendimet e dhëna nga gjykata janë bërë në mungesë dhe ne do të hapim nga fillimi dosjen “Hajdari”. Klienti im nuk ka frikë dhe asnjë shqetësim, u shpreh Dashi përpara gazetarëve.
Izet Haxhia, është dënuar me 25 vite burg për vrasjen e Azem Hajdarit. Haxhia është arrestuar nga policia turke në vitin 2006, pasi ishte në listën e të kërkuarve të Interpol Tiranës. Ai kërkoi strehim politik në Turqi, me argumentin se i rrezikohej jeta. Atij nuk iu miratua azili po përfitoi një leje qëndrimi për një kohë të pacaktuar, me kushtin që të mos dilte jashtë Turqisë.
Për 12 vjet me radhë, autoritetet turke kishte refuzuar transferimin e tij në Shqipëri, por dy muaj më parë, Gjykata e Lartë Turke aprovoi ekstradimin dhe ky vendim u pranua edhe nga Ministri Turk i Drejtësisë.
