Federatat kishin rënë dakord që të zhvillonin një ndeshje miqësore mes Shqipërisë dhe Kosovës në tokë neutrale, por kjo duket e pamundur. Ishte zgjedhur Zvicra për të zhvilluar këtë ndeshje, por këta të fundit duket se nuk e kanë dhe lejen për këtë sfidë me pretendimin se cenon sigurinë. Por zviceranët në të vërtetë i tremben faktit që duke lejuar një ndeshje të tillë të zhvillohet në sy të talenteve që po rriten, mund të rrezikojnë që ti humbasin.
Presidenti i Federatë Kosovare të Futbollit, Fadil Vokrri në një intervistë për Kosova Press thotë se nuk kanë marrë ende lejen: “Po afër anulimit është sepse Federata e Futbollit Zviceran nuk e ka dhënë lejen. Duhet tashmë vetëm njoftimi zyrtar për anulimin e miqësoren që ishte programuar ën fund të këtij muaji. Edhe opsionet për zhvendosjen e miqësores në një stadium tjetër, po bien nga dita në ditë”, u shpreh Vokrri.
Lajmi është konfirmuar për Top Channel edhe nga presidenti Armand Duka: “Po është e vërtetë ajo që ka deklaruar presidenti Vokrri dhe ne jemi duke kërkuar mundësi të tjera për të shfrytëzuar këtë periudhë sa më mirë për ekipin dhe trajnerin”, tha presidenti Duka. Nga burime jo zyrtare ndërkohë mësohet se një alternativë mund të jetë përballja me Austrinë, duke qenë se e ka këtë datë e ka lirë. Federata ka nisur kontaktet edhe pse për momentin nuk konfirmon asgjë zyrtarisht.
