“Tifozët Kuqezi” prej më shumë se një viti nuk kanë qenë të pranishëm në asnjë stadium në ndeshjet që kombëtarja shqiptare ka zhvilluar në shtëpi. Ky bojkot ka qenë një problem i madh, pasi janë pikërisht ata që ndezin atmosferën dhe karikojnë ekipin në momente të vështira. Pas shumë kohësh edhe presidenti i Federatës Shqiptare të Futbollit është dorëzuar para këtij fakti dhe ka hapur dyert për të organizuar takimin e kërkuar nga ky tifogrup. Ditën e sotme është organizuar një takim mes presidentit Duka, përfaqësuesve të këtij grupimi dhe Policisë së Shtetit.
Në përfundim të këtij takimi, Duka u shpreh i bindur se “Tifozët Kuqezi” do të rikthehen në stadium: “Jemi në një klimë tjetër. “Tifozët Kuqezi” kanë bërë kërkesat e tyre, por unë besoj se do të kthehen në stadium për të mbështetur Kombëtaren. Ky është edhe qëllimi i tyre”.
Shkaku i bojkotit të “Tifozëve Kuqezi” për ndeshjet e kombëtares u bënë masat shumë të rrepta që Policia e Shtetit mori për ndeshjen me Izraelin dhe Presidenti Duka theksoi se edhe në këtë pikë u arrit një akord mes këtij grupimi dhe Policisë.
“Policia e Shtetit premtoi se do të ketë një sjellje korrekte dhe të bazuar në ligj, duke theksuar se do të këtë shumë pak forca policie, për të mos thënë asnjë në tribunën e “Tifozëve Kuqezi”. Sigurisht, kjo edhe duke marrë garancinë se edhe ky grupim do të ketë një sjellje korrekte”, deklaroi Duka.
Për ecurinë e këtyre bisedimeve foli edhe Elton Çela, përfaqësues i grupimit “Tifozët Kuqezi”: “Kemi bojkotuar ndeshjet e kombëtares prej më shumë se një viti. Me FSHF-në dhe Policinë e Shtetit diskutuam për shumë pika, por për një vendim do t’ju njoftojmë në orët e mbrëmjes”.
