Stadiumi që do të jetë shtëpia e re e kombëtares shqiptare është duke u ndërtuar me ritme të shpejta. FSHF ka publikuar pamjet e fundit të “Arenës Kombëtare”, ku tri tribuna janë thuajse të përfunduara dhe tashmë po punohet për tribunën kryesore.
Tribuna karshi është pothuajse drejt përfundimit, sa i takon konstruksionit të betonit dhe atij metalik, me punimet kanë arritur deri në katin e fundit të stadiumit, ku ka mbetur vetëm një pjesë për tu plotësuar. Në tribunën jugore mbrapa portave është për tu plotësuar vetëm një sektor ku do të jetë kulla e kontrollit, e cila do të ketë lartësinë e impiantit. Punimet kanë ecur me ritme të larta edhe në tribunën veriore mbrapa portave, ku skelat janë ngritur thuajse deri në fund.
Në qendër të stadiumit, aty ku do të jetë terreni i lojës binte në sy prezenca e një strukture të madhe hekuri me ngjyrë gri. Bëhet fjalë për platformën që do të shërbejë për mbulimin e stadiumit Arena Kombëtare, e cila do të vendoset në vendin e saj sapo të ketë përfunduar ngritja e plot e tribunave.
Impianti me kapacitet 22 mijë vendesh pritet të përfundojë plotësisht gjatë tremujorit të parë të vitit të ardhshëm, ndërsa është sërish një prej kandidatëve për zhvillimin e finales së Superkupës së Europës në vitin 2020.
