Ish-presidenti i Republikës, Bujar Nishani përmes një postimi në rrjetin social Facebook, ka analizuar situatën politike ne vend. Nishani ka vendosur theksin tek situata alarmante në të cilën ndodhet populli shqiptar.
Sipas tij, ardhja e Komisioneres së Lartë për Politikën e Jashtme të BE, Mogherini dhe Komisionerit për zgjerim Hahn, është një lajm i mirë por kurrsesi nuk mund të ndryshojë situatën politike në Shqipëri.
Nishani ka shtuar se shqiptarët nuk i ndryshon aspak realiteti i hidhur që po jetojnë me ardhjen e përfaqësuesve evropianë.
Megjithatë, Nishani shkruan se për një pjesë të shqiptarëve ardhja e zyrtarëve të lartë të Brukselit pritet me shumë shpresë nga opinioni publik në Shqipëri.
Me shpresën se të vërtetat e hidhura të jetës së përditshme të tyre nuk pranohen nga ata që kanë ndërtuar një realitet ndryshe dhe njerëzor për qytetarët e tyre.
Me shpresën, se fuqia e këtyre vendeve dhe shoqërive, gjeneruar nga liria dhe e drejta, më së paku ka forcën të mbajë gjallë besimin tek ata që ende përpiqen për të njëjtat parime dhe realitete që mysafirët përfaqësojnë.
