Janë hapur dyert e mortit në familjen Murataj nga fshati Kutë i Mallakastrës. Djali 32-vjeçar i kësaj familjeje Fisniku, kushëriri i tij, Agustin 30-vjeç dhe e fejuara e tij shtetasja franceze, humbën jetën tragjikisht në aksidentin e frikshëm një ditë më parë.
Me lot dhe britma viktimat janë përcjellë për në banesën e fundit.
E ndonëse vetëm një ditë më parë ata gëzonin për ardhjen e nuses se re në shtëpi, sot lotët dhe dhimbja i ka pushtuar të gjithë.
SI NDODHI AKSIDENTI
Aksidenti tragjik me 3 jetë të humbura u shënua mëngjesin e së hënës rreth orës 08:10 në aksin Levan-Tepelenë, ku 2 kushërinjtë Fisnik e Agustin Murataj si dhe një shtetase franceze Naza Aham, e fejuara e Fisnikut, ktheheshin nga dasma e vëllait të këtij të fundit. Automjeti tip “Suzuki” me targa greke IHZ 1755 që drejtohej nga Fisnik Murataj, përfundoi në një kanal në anë të rrugës pranë fshatit Varibop dhe fatkeqësisht 3 të rinjtë u mbytën në ujërat e tij.
Fisnik Murataj dhe Naza Aham, nga Rodezi, një qytet i vogël në jug të Francës ishin të fejuar dhe bashkëjetonin në Greqi.
Paraprakisht dyshohet se mjeti ka dalë jashtë rruge si pasojë e shpejtësisë së lartë, megjithatë po hetohet për të zbuluar detaje të tjera për rrethanat.
