Presidenti amerikan Donald Trump i është përgjigjur deklaratave të ashpra të bëra nga ana e Rusisë, e cila paralajmëroi SHBA-në, që të mos guxojë të sulmojë Sirinë, pasi do të përballet me pasoja të rënda.
Kështu Presidenti amerikan ka premtuar se do t’i përgjigjet ashpër sulmit kimik në Siri.
“Kemi shumë mundësi ushtarake dhe do të vendosim shumë shpejt se çfarë përgjigje do t’i japim këtij sulmi. Aktualisht, po qartësohemi se kush janë përgjegjësit e sulmit në Douma, ditën e shtunë”, deklaroi Trump.
Mendohet se janë dhjetëra viktima nga ky sulm, por numri i saktë ende nuk dihet.
Perëndimi e ka dënuar ashpër sulmin kimik në Siri, ndërkohë që në një mbledhje të Këshillin e Sigurisë së Kombeve të Bashkuara, Rusia dhe SHBA kërcënuan njëra-tjetrën me fjalë të forta.
Vassily Nebenzia i Rusisë tha se sulmi ishte i inskenuar dhe një përgjigje ushtarake nga ana e amerikanëve do të kishte pasoja të rënda. Ndërsa përfaqësuesja e Amerikës, Nikki Haley tha se Rusia ka në duar gjakun e fëmijëve sirianë.
Damasku dhe aleatja e tij Moska mohojnë çdo përgjegjësi dhe SHBA i ka kërkuar Këshillit të Sigurimit të OKB-së të nisin një hetim për të hedhur dritë mbi ngjarjen.
Ministri i jashtëm rus, Sergei Lavrov tha me herët se nuk ishte gjetur asnjë provë për sulm me armë kimike në Douma. Shoqata mjekësore siriano-amerikane pretendon se mbi 500 persona u dërguan në spitalet e Duomës me simptoma që sugjeronin ekspozim ndaj agjentëve kimikë.
Viktimat e sulmit të së shtunës thuhet të jenë mbi 60, por bilanci pritet të rritet edhe më shumë, ndërsa grupet mjekësore po përpiqen të fitojnë akses në bodrumet ku janë strehuar shumë familje. TIRANA TODAY
