Analisti Fatos Lubonja deklaroi sonte se protesta e fundit në Rrugën e Kombit, është një rezultat normal që vjen pas shtypjes, poshtërimit dhe sundimit të Edi Ramës dhe oligarkëve. I ftuar në emisionin “Studio e Hapur”, në News 24, Lubonja tha se kryeministri nuk punon për qytetarët por punon me oligarkët. Analisti tha se Rama përdor edhe bodyguardët e oligarkëve, përdor paratë e këtyre për sundimin e tij dhe njerëzit duhet të pranojnë tekat e tyre.
“Mendoj se kjo që ndodhi, është rezultat i një sistemi që është ngritur në Shqipëri, qe ka marrë theksim të veçantë me qeverinë Rama, është një sistem i bazuar mbi mashtrimin dhe grabitjen. Edhe pse kemi parti te majtë, qeverisja është në interest ë një grushti oligarkësh. Kryeministri nuk përfill as debatin, dialogun apo hallet e njerëzve. Kryeministri nuk punon për qytetarët por punon me oligarkët. Ai përdor mjetet e tyre materiale, për të qeverisur vendin bashkë me ta. Merrem me shumë raste, ku për të realizuar qëllimet e veta, përdor edhe bodyguardët e oligarkëve, përdor paratë e këtyre njerëzve. Ky është një mekanizëm sundimi dhe njerëzit duhet të pranojnë tekat e tyre,” deklaroi Lubonja.
Analisti komentoi edhe batutën banale të kryeministrit në parlament, ku i “mburrej” Lulzim Bashës, se populli nuk ngrihet.
“Edi Rama e trajton popullin si të kastruar. Po kush e ka kastruar popullin? Ai me oligarkët e vet. Jemi të gjithë kuksianë, të trajtuar kështu,” thekson Lubonja.
Lubonja shprehet se qeveria sot funksionon me akte fashistoide.
“Ku të shkojnë njerëzit? Kur thua fjalë, thotë jeni dele nuk protestoni. Këto janë akte fashistoide. Pushteti ka kapur mediat dhe gjithçka. Bashkëpunon dhe me krimin e organizuar. Në këtë situatë njerëzit ose ikin, ose disa u vjen aty ku nuk durojnë dot më, të shtypur, të poshtëruar. Duhet të kishim reaguar të gjithë,” tha Lubonja.
