Projektet e qeverisë shqiptare për ndërtimin e infrastrukturës rrugore përmes strategjisë së PPP-ve tashmë duket se nuk kanë asnjë dobi për ekonominë dhe taksapaguesit.
Pas kritikave të vazhdueshme se kjo strategji dëmton rëndë taksapaguesit shqiptarë, vijon mbështetja nga qeveria shqiptare dhe beson fort tek kjo skemë. Për këtë ka reaguar edhe Gjykata Europiane e Audituesve, e cila e dënon forcërisht këtë strategji.
Kujtojmë problematikat e rrugëve në Shqipëri, ndërsa rasti i fundit është ai i abuzimit me segmentin e rrugës Tiranë-Elbasan. Projekti i rrugës Tiranë-Elbasan ka rezultuar me vjedhje, ndërkohë në pranga ka përfunduar ish-drejtori i ARRSH-së, Dashamir Xhika, i cili mbante këtë post nga radhët e LSI-së. Abuzimet me tenderin e kësaj rruge, kanë çuar edhe ish-drejtorë të projekteve dhe të menaxhimit, pasi dëmi që i kanë shkaktuar buxhetit të shtetit është në shifra të larta.
Dashamir Xhika mbante postin e këtij institucioni me bekimin e koalicionit PS-LSI. Hetimet për këtë rrugë, janë shtrirë edhe tek ish-ministri i Transporteve Edmond Haxhinasto, por ky i fundit ka deklaruar se këto janë akuza politike. Ajo e përmes raportit dhe përllogaritjeve ka dalë në përfundimin se kjo skemë sjell dëme të mëdha financiare.
Kreu i qeverisë Edi Rama ka deklaruar se kjo është një strategjia, e cila duhet të implementohet pasi ekonomia shqiptare nuk ka në dispozicion para të mjaftueshme për përfundimin e veprave rrugore. Gjykata Europiane e Audituesve deklaroi se kontratat e partneritetit publik-privat sjellin humbje të mëdha financiare për taksapaguesit. Përfundimi ka dalë pas auditimit të 87 kontratave koncesionare, që janë dhënë nga vendet e Bashkimit Europian për periudhën 2000-2014.
Analiza e ekspertëve të gjykatës është fokusuar veçanërisht në 7 projekte autostradash në Greqi dhe Spanjë. Sipas raportit, këto projekte janë tenderuar me një kosto fillestare prej 7.8 miliardë eurosh. Por, gjatë zbatimit, kostoja e tyre është rritur me 1.5 miliardë euro të tjera, ose gati 20 për qind mbi vlerën fillestare, të cilën gjykata e ka klasifikuar si dëm ekonomik.
Por, ky nuk është dëmi i vetëm i konstatuar. Veç rritjes së kostove, realizimi i projekteve me partneritet publik-privat ka rezultuar me vonesa të mëdha në përfundimin e veprave, deri në 5 vite nga afati fillestar.
“Përfitimet potenciale të PPP-ve shpesh nuk janë arritur, për shkak të vonesave dhe rritjeve të kostove, duke rezultuar në 1.5 miliardë euro shpenzime joefektive”, thuhet në vendim.
Kjo është hera e parë, kur Bashkimi Europian kryen një analizë të hollësishme mbi projektet koncesionare të dhëna nga vendet anëtare. Sipas raportit, politika e partneritetit publik-privat ka rezultuar në dëme të konsiderueshme financiare për qytetarët.Ndaj, gjykata u ka rekomanduar vendeve të BE-së të ndalojnë promovimin e kësaj politike, deri në ndërtimin e një kuadri ligjor më të fortë për koncesionet.
Raporti i gjykatës vjen në një kohë kur qeveria shqiptare po përdor në mënyrë agresive politikën e partneritetit publik-privat. Përveç koncesioneve në Shëndetësi apo shërbimet e tjera publike, qeveria shqiptare do të miratojë edhe 5 kontrata të mëdha rrugësh me vlerë një miliard euro.
Kjo nismë ka alarmuar Fondin Monetar Ndërkombëtar, i cili i ka kërkuar publikisht qeverisë të pezullojë dhënien e koncesioneve, për të mos rrezikuar financat e shtetit dhe ekonominë kombëtare.
https://tiranatoday.com/fmn-bllokon-ramen-koncesionet-po-gremisin-shqiperine/
https://tiranatoday.com/pas-xhikes-se-lsi-se-fmn-shpulle-rames-ppp-ja-jote-korruptive/
